الجمعة، 17 فبراير 2012

انترفيو المبيعات بشركة TEData




كل ما يخص إنترفيو المبيعات بشركة TEData
النهارده  انا هاقولكم كل حااااااجه عن إنترفيو شركة TEData   لوظيفة Sales Representative  مبيعات فى تى إيداتا
 بس دى تعتبر معلومات سريه و المفروض ماتعرفش اللى بيعملك الإنترفيو او اللى موجودين معاكم فى الإنترفيو إنكم عارفين المعلومات دى عشان لو إتعرف إنك عارفها هايسقطك الاتش أر فى الانترفيو فإحنا بنعرفك بالمعلومات دى كمساعده ليك عشان ربنا يوفقك و تشتغل فى الشركه فماتقولش إنك عارف حاجه عن الكلام ده

اولاً  حااااجه لازم تعرفوها  و هى إنكم تروحوا الإنترفيو لابسين فورمال
يعنى  بدله كامله و كرافت
 
بالنسبه للمرتب و طبيعة الشغل فهو :
الراتب 2250 Groth Salary   + خط إنترنت 512 هديه و تمنه على الشركه 95 ج
طبيعة العمل : سيلز فى فروع الشركه و مراكز الدفع الخاصه بالشركه
بتشتغل 3 أيام  و بتاخد أجازه 3 أيام
ايام العمل 12 ساعه و داخلهم ساعتين راحه , يعنى بتشتغل 10 ساعات
و بالنسبه للإنترفيو فهو بيكون فى اماكن مختلفه يعنى مش مكان واحد يعنى ممكن يكون فى قاعه فى مصر الجديده او فى فندق سوفيتيل المعادى او فى القريه الذيكيه فى شركة تليكوم إيجيبت او فى شركة إكسيد و اماكن تانيه متغيره مش ثابته
هاتدخلوا حوالى 20 واحد هاتتقسموا على فريقين كل فيق 10 أفراد و هايقوم كل واحد كاتب إسمه و إيميله على ورقه قدامه


و بعد كده بيتم تشغيل فيديو تعريفى بشركة تى إيدياتا و تاريخها و حجمها فى السوق و الكلام ده تخلى بالك منه جداً عشان بعدها بشويه بيقوموا عامليين لكل واحد إنترفيو صغير كده بالإنجليزى طبعاً
قدم نفسك   introduce your self ؟؟
و المفروض تسمع فيه السى فى بتاعك بكل ما فيه من كورسات و خبرات عمليه
و بعدها هاتقولولك ليه حابب تشتغل فى تى إيداتا ؟؟   Why you want to work in customer service in tedata ??
  او تعرف إيه عن تى إيداتا ؟؟
What are you know about TEData ??
و المفروض دلوقتى تجاوب من الفيديو إللى كانوا بيعرضوه فى اول الانترفيو و تقول عشان هى شركه كبيره جداً و منتشره بشكل كبير فى الوظن العربى اجمع و ليها نسبه اكتر من 70% من حجم الإنترنت فى مصر و فيها حجم عماله اكتر من كذا ( الرقم بيكون فى الفيديو )و الإجابه عليه بتكون إنجليش

و بعد كده بيقدمولكم ورقه فيها 3  أسئله و انت بتجاوب عليها
1-     ايه هو الوب سيت بتاع تى اى داتا على النت ؟ وايه هو الخط الساخن الخاص بالشركه ؟
و دى اجابة السؤال ده

للنسخه الإنجليزى
 www.tedata.net/eg/en
للنسخه العربى
www.tedata.net/eg/ar
و الرقم الساخن الخاص بخدمة العملاء بالشركه  19777
 2- اتكلم عن عرض من عروض تى اى داتا
و انت بتبقى حافظ عرض السرعات و أسعارها و أحدث عروض الشركه

و هنا هاتلاقى عروض الأسعار
 http://www.tedata.net/eg/ar/Home-ADSL/Home-ADSL-Prices-List

و باقى العروض على الموقع هاتلاقوها   www.tedata.net/eg/ar

3 - ايه هى الخدمات اللى بتقدمها تى اى داتا
 واجابت كل الاسئلة دى هتلقوها على الموقع الخاص بها  www.tedata.net/eg/ar



بعد كده بيقوموا عارضين مشكله معينه فى الشركه و يقولولكوا كل فريق يقعد يناقـش و يشوف إزاى هاتحلوا المشكله دى

و بيكون فى واحد منكم معاه نوته و قلم عشان يكتب نقاط مختصره عن حلول المشكله إللى توصل ليها الفريق كله

و المشكله دى بتتغير من إنترفيو للتانى و مثلاً بتكون
إتكلم عن ازاى تطور من نفسك بحيث تتعامل مع العميل الغضبان باحترام  ؟
و ازاى توصل لرضا العميل الغضبان فى اخر المكالمة ؟
و تعمل إيه لو الشركه نزلت عرض فى جديد فى الجرنال و لسه ماجالكش بيه خبر و لاقيت عميل بيتصل بيك يسأل عن العرض ده وانت ماتعرفش عنه حاجه و المفروض تقوله معلومات عن العرض ده .. هاتعمل إيه فى الحاله دى ؟؟

المهم خلى بالك فى الفتره دى بتفضل ميس نهى و مستر معتز ( او الإتش أر المسؤولين فى الإنترفيو ) رايحين جايين على الفريقين و بيقيموا كل فريق و كل فرد فيه على حسب نسبة مشاركته و تفاعله فى الفريق بتاعه
و بعد كده بيقوموا موقفين الوقت و يسألوا كل فريق على حده مين فى الفريق كان اقل واحد مشاركه فيكم و إنتم كلكم بتتفقوا عليه و بتقولوا فلان و فى الفريق التانى نفس الموضوع و بعدها يقوموا مبدلين الشخصين دول مع بعض
(  يعنى محمد ماكنش متفاعل فى الفريق أ و احمد ماكنش متفاعل فى الفريق ب يقوموا مخليين محمد فى الفريق ب و احمد يبقى فى الفريق أ )

و بعدها تقعدوا تكملوا حل المشكله بتاعتكم
و بعدها تقوموا يخلص الوقت و يقوم قاعد كل فريق وواحد ينوب عن الفريق يتكلم عن الحلول الممكنه لحل المشكله مع الإتش أر و بعدها يسألوا هل حد تانى من الفريق ليه رأى إضافى و لو عندك رأى المفروض تقوله عشان بيقيموك عليه
و نفس الموضوع بيتم مع الفريق التانى
و بعد كده يسألوا كل فريق هل حد فيكم عنده مقترحات عن حل مشكلة الفريق التانى


و بعد كده يقوموا مخرجينكم كلكم خارج الغرفه و يقولوكلم إنتظروا عشان اللى نجح فى الجزء ده هنادى على إسمه

و بعدها بينادوا على أسماء إللى نجحوا و هايكملوا المرحله اللى جايه و الباقى بيعتزرولهم و بيعرفوهم إنهم ممكن يتصلوا بيهم يعرفوا إيه سبب انه ماتقبلوش و بيقولولهم إنهم يقدروا يقدموا تانى بعد 6 شهور

وو بعد كده اللى نجح بيتنقل المرحه التانيه و دى بتتم لواحد واحد  لوحده
======================================

و دى بيتم فيها عمل Real case  يعنى حاله واقعيه كانك شغال و جالك عميل متعصب و عنده مشكله
و اللى بيمثل دور العميل هو مستر معتز و ميس نهى بتمثل زوجة العميل
و طبعاً الإتنين متعصبين لأقصى درجه من سببين و هما الروتر بايظ و التانيه النت كل شويه بيقطع

بالنسبه لمشكلة الرواتر بايظ فبيدخل مستر معتز عليك و معاه علبة مناديل ويقوم راميها فى وشك على إنها راوتر و هو عميل قدامك و المفروض تحلله مشاكله بالعقل و ترضيه و تحافظ على سمعة الشركه و ده بيكون كاتالى :

فى البدايه العميل بيكون متعصب جداً و داخل فيك شمال و بيسمعك ألفاظ المفروض إنها غير أخلاقيه و دى بتكون نابعه من انه عميل متنرفز
فإنت دورك إنك تتكلم معاه و تحاول تعرف سبب مشكلته و طبعاً هو هايكون رافض و عايز يرجع الراوتر و يلغى إشتراكه فى الشركه فإنت بتحاول تهدئه و تعرف إسمه و تعرفه إنك هاتحلله مشكلته حالاً و للى هو عايزه هايتعمل
و عشان تبدأ تحل المشكله فإنت عايز تعرف إسمه عشان تعرف تتواصل معاه هايقوم قايلك إسمه إيه

و فى الفتره دى هاتقوم زوجة العميل مزعقه و قايلاله إيه ده هو انت لسه هاتتكلم معاه إحنا عايزين نلغى الإشتراك مش عايزين نتكلم
و انت ردك عليها حاضر يا فندم إللى حضرتك عايزاه هايتم هاتقوم هى ساكته

تقوم مكمل كلامك مع العميل

 و بعد كده هاتسأله عن مشكلته هايقولك الراوتر ده بيخرف هاتقوم واخده منه و قايله واله تزعل نفسك ييا فندم شركة تى إيداتا هاتديلك الروتر ده هديه من الشركه ليك بدل الراوتر اللى فيه مشكله
هايقولك يعنى إنت بتبقشش عليا
هاتقوله لآ يا فندم بس حضرتك عميل فى شركة تى إيداتا و الشركه بتهتم جداً بعملائها و غرضها الأساسى هو رضاءكم يا فندم فالروتر دا هديه صغيره جداً من الشركه لحضرتك يا فندم و نأمل ان بكده تكون إتحلت مشكلتك
( و تقوم مديلوا علية المناديل إللى إتحدفت فى وشك فى البدايه )

و تقوم سأله هل فى اى مشكله تانى بتواجه حضرتك يا فندم بخلاف الروتر

- هايقوم قايلك النت بيقطع كل شويه
هاتقوله حضرتك تبع سنترال إيه يا فندم
هايقولك سنترال كذا
هاتقوله فى مشكله الفتره دى فى كابلات النت الموجوده داخل سنترال كذا عشان إنتهى عمرها الإفتراضى و إحنا دلوقتى نعمل على إصلاحها فى أسرع وقت و بعتنا نجيب أسلاك مستورده من أميريكا و عمرها الإفتراضى 20 سنه و دا طبعاً عشان إحنا يهمنا ان العميل يكون مرتاح و ماتوجهوش اى مشكله



و بتسأله اعتقد كده مشكلة حضرتك إتحلت يا فندم
فهل فى اى مشكله تانى بتواجهك مع الشركه
هايقولك لأ خلاص كده تمام
فطبعاً هاتنهى الحوار معاه بالترحيب ( سعداء لزيارة حضرتك يا فندم و لو واجهتك اى مشكله فإحنا فى خدمتك يا فندم و ان شاء الله تكون راضى دايماً عن شركة تى إيداتا .. نورتنا يا فندم .. و تسلم عليه

و بعد كده بتخرج تنتظر و بيدخل غيرك لحد ما يخلص عدد الواقفين
و بعد اخر واحد يطلع بتطلع ميس نهى و تقولكم مين إللى نحج

==============================
و ساعات شكل المشكله اللى بيعملوها دى بتتم بشكل تانى و هى ان الاتش أر بيعقدك على كرسى و يخليك تديلوا ظهرك و هو يتكلم بعصبيه على إنه عميل غضبان و يشوف ردك عليه هايكون إزاى  ؟
 و طبعاً الموضوع ده بيتم لواحد واحد من المتقدمين و كل واحد هايدخل الاتش أر هايفكرلو فى فكرة مشكلة جديدة


و لازم طبعاً تجاوب بهدووء و ماتتعصبش و انت بتتكلم عشان هو هايتعمد يعصبك
=============================

و هايعدى للمرحله التالته  و برضوا دى بتتم لواحد واحد
==============================


المرحله دى بقا هى مرحلة الإقناع البحت
يعنى تحاول تقنع العميل بشىء حتى لو انت مش مقتنع بيه فهما بيقيسوا الموضوع ده عندك عن كريق الأتى :

- يجى مستر معتز يسألك سؤال و يقولك إقنعنى إن التدخيل مفيد

و طبعاً السؤال غير منطقى لكن إنت لازم تجاوب عليه و تحسسه إنك مقتنع جداً بكل كلمه بتقولها و انت بتقنعه إن التدخين مفيد

يعنى تقوله التدخين بيساعد الفرد على التفكير نظراً لانه بيزيد النيكوتين فى الدم و ده المسؤول عن ان الواحد يكون مركز دايماً
دا غير ان التدخين بيحسسك براحه نفسيه جامده

هايقولك يعنى انت بتحب التدخين ؟
هاتقوله طبعاً دا كفايه ان السيجاره هى الشىء الوحيد اللى بيحترق من علشان يشعرنى بالراحه و السعاده
( حتى لو انت أصلاً مابتدخنش و مابتطيقش ريحة السجاير لازم تقوله كده )


- يجى بعد كده ميس نهى و تقولك إقنعنى ان عمل المرأه هام و أفيد من عمل الرجل

هاتقوم قايلها طبعاً عمل المرأه مفيد جداً لان المرأه نصف المجتمع و بالإضافه ان المرأه لديها قدره اعلى على التركيز فى العمل عن الرجل فعشان كده عمل المرأه أفيد للشركه و للمجتمع ككل

هاتقولك هل انت مع عمل المرأه
هاتقوم بكل ثقه قايلها اه طبعاً معاه
( حتى لو انت مش ناوى تخرج مراتك من البيت )


هاتقوم قايلالك هل انت توافق انك تقعد فى البيت و مراتك تبقى شغاله ؟
هاتقلها و فيها إيه

هاتقولك بما انك مشجع لعمل المرأه هل تقبل إنك تاخد منها مصروف  بيتك و تبقى هى شغاله و انت قاعد فى البيت ؟؟

بكل ثقه هاتقولها هاتيلى إللى هاتشتغل و تصرف على البيت وانا هاقعد فى البيت :)

( الكلام ده انت بتقوله طبعاً بغرض إنك تقنع بيه إللى قدامك حتى لو انت مش مقتنع بيه عشان دا غرضه قياس قدراتك على الإقناع )

و بعد اخر واحد يخرج بتطلع ميس نهى تقولكم مين اللى أكسبتتد و نجح معاهم و بتعرفكم هاتبدؤا من إمته التدريب و المكان اللى هاتنزلوا فيه التدريب


و دى بيانات الشركه كلها و وسائل التقديم فى الشركه



TE Data
العنوان : 1- 94 شارع التحرير-  الدقى  -برج المغربى بلازا - الدور السابع
2-  القرية الذكية - الكيلو 28 طريق القاهرة الإسكندرية الصحراوى ، 6 اكتوبر 12577 ، مصر , A11-B90 -
3 - جزيرة العرب المهندسين برج HSBC الدور ال 6

تليفون02 333 20 700
فاكس   02 333 20 800
 ودا رابط التقديم اونلاين

هاتختاروا المجال المطلوب العمل فيه
و تملىء البيانات
و تحمل السى فى
و تكتب الكود المكتوب بالكابيتال ليترز
و تدوس     Send Resume’
http://www.tedata.net/eg/en/Careers/Register-And-Upload-Your-CV
 و دى الإيميلات إللى تقدروا تقدموا
 ال  CV علىها :
career@tedata.net
recruitment@tedata.net
hr@tedata.net
www.facebook.com/groups/jobsforu
noha.tarek@tedata.net
sherry.raouf@tedata.net
ashraf.fawzy@tedata.net
hani.hamdy@tedata.net
marcom@tedata.net

saiidtam@tedata.net.eg
khoshala@tedata.net.eg
beleidy@tedata.net.eg
ramadanm@tedata.net.eg

هناك تعليقان (2):